Estrutura orgánika Ministériu Negósius Estranjeirus no Kooperasaun kompostu husi Sekretariadu Jerál, nu'udar responsável atu garante servisu instrumentál ka apoiu sira ba funsionamentu interna ministériu nian, iha área sira serbisu jerál, jestaun finanseira no efetua koordenasaun ho diresaun nasionál 8 ne'ebé integra iha nia-administrasaun; Diresaun Jerál ba Asuntu Bilaterál mak responsavel ba monitorizasaun no koordenasaun relasaun diplomátika entre Timor-Leste ho Estadu sira seluk iha diresaun nasionál tolu; Diresaun Jerál ba Asuntu Multilaterál no Rejionál mak responsavel ba monitorizasaun no koordenasaun Timor-Leste nia partisipasaun iha ámbitu organizasaun internasionál sira ho reforsu husi Diresaun Nasionál 3; Diresaun Jerál ba Asuntu ASEAN nian mak responsável hodi halo monitorizasaun ba prosesu adezaun ba ASEAN. Diresaun ne'e iha Diresaun Nasionál 3; Diresaun Jerál ba Asuntu Konsulár no Protokolu, mak responsável atu administra rede postu konsulár sira Timor-Leste nian, no organiza protokolu Estadu nian tuir estabelesimentu diresaun nasionál prinsipál tolu; Ikusliu, Inspesaun no Auditória hanesa responsável atu verifika kumprimentu ba lejizlasaun no regulamentu sira ne'ebé iha relasaun ho funsionamentu Ministériu nia servisu interna no esterna sira. Gabinete Inspesaun no Auditoria relata diretamente ba Ministra. Inspetór Gabinete
Perfíl Ministra
DR. Adaljiza Albertina Xavier Reis Magno
Negosius Estranjeirus no Kooperasaun Repúblika Demokrátika Timor-Leste
Hahú ninia karreira profisionál ho Organizasaun Naun Governamentál oioin iha Timor-Leste, hafoin nia deside atu envolve ativamente iha polítika no kuñesidu hanesan defensora ba jéneru no ativista direitus umanus nian. Iha eleisaun primeiru tinan 2001 no ho idade 25, eleitu hanesan membru Asembleia Konstituinte iha Timor-Leste husi partidu polítiku FRETILIN. Asembleia Konstituinte hanesan órgaun demokrátiku dahuluk iha Timor-Leste molok restaurasaun independénsia ne'ebé iha misaun espesiál atu hakerek no aprova Konstituisaun Timor-Leste nian. Iha transformasaun Asembleia Konstituinte Parlamentu Nasionál iha 2002, nia kontinua servisu nu’udar membru Parlamentu Nasionál to’o 2005. Iha tinan ne’ebé hanesan iha 2005 ho idade 30, nomeadu hanesan Vise-Ministru Negósius Estranjeirus no Kooperasaun, ba 1, 2 no 3 Governu Konstitusionál Timor-Leste nian, iha Primeiru-Ministru na'in tolu ne’ebé la hanesan. Iha Governu Konstitusionál datoluk, dezignadu hanesan Ministra interina Ministériu Negósius Estranjeirus no Kooperasaun ba fulan 3 to'o forma Governu Konstitusionál IV.
Dra. Magno estuda kona-ba Ekonomia iha Sekolah Tinggi ilmu Ekonomia Atma Bhakti, iha Fundasaun Sebelas Maret iha Solo – Surakarta, Java Sentrál, Indonézia. Dra. Magno ativu tebetebes iha organizasaun juventude balun hanesan PMKRI (Uniaun Universidade Katólika Repúblika Indonézia), Klube Estudu Sahe iha Jakarta no IMPETTU Surakarta (Uniaun Estudante Timor-Leste iha Surakarta). Hafoin remata ninia kursu ekonomia, nia hahú ninia karreira profisionál hanesan voluntáriu iha Yayasan HAK (Fundasaun HAK), FOKUPERS (Forum Komunikasaun ba Feto Timor-Leste) no Insitutu Sahe ba Libertasaun (SIL – Sigla Ingléz) no organizasaun Naun Governamentál oioin iha Dili.
Dra. Magno preokupa tebetebes kona-ba importánsia husi boa governasaun ba sosiedade demokrátiku foun hanesan Timor-Leste. Ba nia, importante atu iha fundasaun forte ida ba jestaun públiku ne'ebé di'ak. Nia fiar metin katak edukasaun sei sai hanesan meiu ida ne'ebé di'ak liu atu hadi'a ninia abilidade iha jestaun públika no atu komprende liután kona-ba oinsá atu dezeña polítika públika ida ne'ebé di'ak ba ninia país ne'ebé foin moris. Tanba ne'e, nia deside atu kontinua ninia estudu Masteradu hodi hadi'a ninia kapasidade no koñesimentu iha jestaun públika. Iha tinan 2013, nia remata nia kursu mestradu iha Jestaun Públika husi Universidade Victoria iha Wellington, Nova Zelandia ho susesu.
Perfíl Vise-Ministru
MR. JULIÃO DA SILVA
Vise – Ministru Negósius Estranjeirus no Kooperasaun Repúblika Demokrátika Timor-Leste
Sr. Julião da Silva, Moris iha Viqueque, iha dia 8 fulan-outubru tinan 1984, no hela permanente iha Dili. Kaben ho Domingas Cristiani Soares Freitas, no iha oan nain 6. nia Oan-Mane husi Martins Freitas, (agrikultór) no Maria de Menezes. Iha tinan 2005 graduadu husi Eskola Ensínu Sekundáriu Liceu 4 de Setembru Dili. Sr. Julião atende formasaun kona-ba lideransa no jestaun estensiva, no hetan esperiénsia iha grupu komunidade ki’ik sira no organizasaun komunidade, organizasaun ONG nasionál no internasionál. Kombinasaun ba programa estratéjiku no esperiénsia planeamentu nian ho abilidade prátika direita, presizaun, serbisu maka'as, no iha interese atu simu responsabilidade foun ma xave ba nia lideransa. Aleinde ida ne'e, Sr. Julião da Silva mós iha ona esperiénsia hanesan; Jerente Programa Saúde Bazeia ba Komunidade no Primeiru Apoiu ba Krús Vermella iha Timor-Leste no Jestór Programa ba Marie Stop Internasionál Timor-Leste (MSITL).
Sr. Julião da Silva ninia karreira polítika hahú iha tinan 2011, nu'udar membru konsellu KHUNTO no iha tinan 2017 – Juñu 2020, Sr. Julião da Silva hetan nomeasaun nu'udar Sekretáriu Estadu ba Asuntu Profisionál no Empregu iha VIII Governu Konstitusionál hodi reprezenta partidu KHUNTO. Aleinde ne’e, Sr. Julião mós nudar Voluntáriu iha Cruz Vermella Timor Leste – Sosiedade Nasionál.
Perfíl Sekretáriu Jerál
FRANCISCO TILMAN CEPEDA
Sekretáriu-Jerál Ministériu Negosius Estranjeirus no Kooperasaun Repúblika Demokrátika Timor-Leste
Embaixadór Francisco Tilman Cepeda hanesan diplomata karreira, ne'ebé agora dadaun kaer kargu nu'udar Sekretáriu-Jerál Ministériu Negósius Estranjeirus no Kooperasaun, pozisaun hanesan ne'ebé nia hala'o ona iha tinan 2012 to'o 2015. Hanesan Sekretáriu-Jerál, Sr. Cepeda mak lidera servisu sentrál Ministériu nian, ne'ebé mak responsável ba jestaun, koordenasaun, supervizaun no asegura apoiu administrativu ba Ministériu tomak, inklui Misaun Permanente no Temporáriu Timor nian iha estranjeiru (Servisu Perifériku nian). Hanesan pioneiru ida husi Servisu Estranjeiru Timor-Leste nian, husi kedas tinan 2001, Sr. Cepeda hala'o ona knaar oioin iha Embaixada timor-Leste nian iha rai-li'ur, entre sira seluk, hanesan Embaixadór Extraordináriu no Plenipotensiariu Timor-Leste nian ba Repúblika Filipinas, husi tinan 2008 to'o tinan 2012, no husi Embaixadór Extraordináriu no Plenipotensiariu Timor-Leste nian ba Reinu Béljika no Uniaun Europeia entre tinan 2016 no tinan 2021.
Durante prezidénsia Komunidade País Lian Portugés (CPLP) nian, Embaixadór Cepeda hetan kna’ar atu koordena Komisaun organizadora Simeira Xefe Estadu no Governu CPLP nian sira ne'ebé hala'o iha Dili iha tinan 2014. Aleinde koalia lian nativu Tétun (lian nasionál no ko-ofisiál Timor-Leste nian), Embaixadór Cepeda mós fluente iha lian portugés, Inglés no Indonézia.
Gráfika MNEK
